Информации за осигурениците

Секој осигуреник може да има една доброволна индивидуална сметка и една професионална сметка во доброволен пензиски фонд. Вложените средства се инвестираат според строго утврдени законски прописи, со што се обезбедува највисока заштита на интересите на осигурениците и на нивните средства.

За членовите на третиот столб нема ограничување во однос на висината и фреквенцијата на уплата на доброволен придонес.

Една од поволносите, кои ги нуди третиот столб на пензиското осигурување, е што корисниците не мораат да бидат вработени, ниту пак да бидат членови на задолжителното пензиско осигурување. Член на третиот столб може да биде секое лице, кое навршило 15 години, но не повеќе од 70 години. Членови на третиот столб можат да бидат и лица, за кои трети лица уплаќаат придонеси.

Износот и динамиката на уплата во третиот столб ја одредувате вие лично. Поволност за членовите во третиот столб е и правото на поврат на персоналниот данок на доход, пресметан на износот на уплатениот придонес во доброволниот пензиски фонд.

Член на Триглав доброволен пензиски фонд можете да станете на неколку начини:

• со потпишување договор за членство со Друштвото за управување и со отворање доброволна индивидуална сметка;
• со потпишување договор за членство меѓу осигуреникот, физичкото лице кое уплаќа придонес во име на осигуреникот (уплаќач) и Друштвото за управување и со отворање доброволна индивидуална сметка. Договорот за членство може да се менува со анекс само доколку настане вклучување, промена, или исклучување на физичкото лице-уплаќач од договорот;
• со учество во професионална пензиска шема и отворање професионална сметка, или
• со отворање доброволна индивидуална сметка и доставување потврда за членство во доброволен пензиски фонд од страна на Друштвото за управување, на член кој има прекин во професионалната пензиска шема, а кој нема доброволна индивидуална сметка.

Едно лице може да има само една доброволна индивидуална сметка и една професионална сметка во ист, или различен доброволен пензиски фонд.

Членот на Триглав доброволен пензиски фонд, со индивидуална доброволна сметка може да премине во друг доброволен пензиски фонд со склучување на договор за членство со друштво кое управува со доброволниот пензиски фонд во кој преминува и со префрлање на средствата од индивидуална доброволна сметка во Триглав доброволен пензиски фонд на доброволната индивидуална сметка во идното друштво.

Член на Триглав доброволен пензиски фонд, како учесник во професионална пензиска шема, не може да премине во друг доброволен пензиски фонд, во периодот додека е вработен, или е член на осигурител.

Во случај кога учесник во професионална пензиска шема премине кај друг осигурител, кој организира професионална пензиска шема, средствата од постојната професионална сметка се пренесуваат на професионалната сметка во професионалната пензиска шема организирана од другиот осигурител.

Доколку член на Триглав доброволен пензиски фонд, кој има доброволна индивидуална сметка, престане да уплаќа придонеси во доброволниот пензиски фонд пред пензионирање, тој останува да биде член на Триглав доброволен пензиски фонд до моментот на настанување на смртен случај, до остварување право на пензиски надомест, или до премин во друг доброволен пензиски фонд и ги има истите права како другите членови на доброволниот пензиски фонд.